Sunday, June 24, 2012

ကျွန်မဆော့ပါသည် သို့သော်..

စနေနေ့ နေ့လည်
နေ့တစ်ဝက်ရုံးဆင်းတော့ သူနဲ့တွေ့ဖို့သွားတော့ ဘတ်စ်ကားစီးဖြစ်တယ် (သူနဲ့မတွေ့လည်း စီးပါတယ်)။ ကျွန်မစိတ်ထဲ ငြီးစီစီနဲ့ ပျင်းရိနေတယ်။ ကလိကလိဖြစ်တာနဲ့ ဘာရယ်မဟုတ် ရုပ်ရှင်ရိုက်ဖို့ စိတ်ကူးမိတယ်။

ဘယ်လိုရိုက်သလဲဆိုတော့ကာ ဘတ်စ်ကားပေါ်မှာ ကိုယ့်ကိုကိုယ် ရန်ကုန်မြို့ရောက် တိုင်းတစ်ပါးသားပုံစံ ဟန်ဆောင်မိတယ်။ စပယ်ယာဆီမှာ စတင်သရုပ်ဆောင်လိုက်တယ်။
“ဘယ်ဆင်းမလဲ”
“နွယ်သာကီး နွယ်သာကီး.. how much? 100 Kyats? ”
စပယ်ယာ နည်းနည်းကြောင်သွားတယ်။ ကျွန်မကထပ်မေးလိုက်တယ်
“100 Kyats? ”
စပယ်ယာက ခုမှသိသွားပြီး လက်နှစ်ချောင်းထောင်ပြတယ်။
“oh 200 Kyats.. ok”
ပိုက်ဆံ ၂၀၀ ပေးလိုက်ပြီး ခပ်တည်တည်နဲ့နေလိုက်တယ်။ စပယ်ယာနဲ့တကွ အနီးအနားကလူတွေ ပြုံးသွားတယ်။ ယုံသွားကြတယ်။ ပြုံးတာကတော့ ဘတ်စ်ကားလာတိုးစီးတဲ့ နိုင်ငံခြားသားကောင်မလေးကို သဘောကျလို့ပဲလား ဘာလား။ (ခုမှပြန်ရီချင်တယ် အဲ့တုန်းကတော့ မင်သေသေနဲ့ပဲ)

ကျွန်မပိုက်ဆံပေးပြီး ရပ်နေတယ်။ ကားက အရမ်းကြီးကျပ်မနေပါဘူး။ မတ်တပ်ရပ်နေတဲ့လူ လေးငါးယောက်လောက်တော့ရှိတယ်။ အန်ကယ်ကြီးတစ်ယောက်က လှမ်းခေါ်တယ်။
“come come.. a place, a place”
“ Thank you”
ကျွန်မနေရာရသွားတယ်။ ဘတ်စ်ကားက ကုက္ကိုင်းမှတ်တိုင်ကိုရောက်လာတယ်။ အဲ့ဒိမှတ်တိုင်မှာ အဖွားကြီးတစ်ယောက်တက်လာပါတယ်။ အသက်ကြီးကြီး ယောဂီဝတ်စုံနဲ့။ ကံဆိုးစွာနဲ့ပဲ အဲ့ဒိအဖွားကြီးအတွက် နေရာမရှိပါဘူး။

ကျွန်မကားပေါ်ကို တစ်ချက်ခြုံငုံကြည့်လိုက်တယ်။ ကျွန်မရဲ့ဘယ်ဖက်ဘေးမှာ ကျွန်မကိုနေရာပြတဲ့ အန်ကယ်ကြီး။ သန်သန်မာမာကြီးပါပဲ။ ညာဖက်ဘေးမှာက ကောင်လေးကောင်မလေးတွေ အဖွဲ့ရှိတယ်။ စကားတွေကျွတ်ကျွတ်ညံအောင်ပြောကြ ရီလိုက်ကြလုပ်နေတဲ့အဖွဲ့ပေါ့။

ကုက္ကိုင်းမှတ်တိုင်မှာ တက်လာတဲ့အဖွားကြီးက ကျွန်မတို့နားမှာ ရပ်နေပါတယ်။ အဲဒိအဖွားကြီးကို ဘယ်သူများနေရာပေးမလဲလို့ ကျွန်မစောင့်ကြည့်နေမိတယ်။ ကျွန်မတို့မြန်မာနိုင်ငံက ဘတ်စ်ကားတွေပေါ်မှာ ဘုန်းကြီးတွေ၊ အသက်ကြီးတဲ့လူ၊ ကလေးနဲ့လူ၊ အထုပ်အပိုးတွေပါတဲ့လူတွေ ကားပေါ်တက်လာရင် ကားပေါ်ကလူတချို့က နေရာပေးတတ်တာ၊ အထုပ်ကိုင်ပေးတတ်တာတို့ အဲဒိဓလေ့လေးတစ်ခုရှိတယ်မလား။ ဒီနေရာမှာ တစ်ခုထပ်ပြောချင်တယ်။ တချို့သောလူတွေပဲ သိတတ်တော့တယ်လို့ ကျွန်မပြောရင် အားလုံးယုံကြမလား။

အဲဒိအဖွားကြီးကို ကျွန်မကြည့်နေတယ်။ ကားက Sedona Hotel ကို တော်တော်ကျော်လာပါပြီ။ အဖွားကြီးနေရာမရသေးဘူး။ ဘယ်သူမှမတွေ့တာလည်း မဟုတ်ဘူး။ မမြင်ချင်ယောင်တောင်ဆောင်နေလိုက်သေးတယ်လို့ ကျွန်မထင်တယ်။ အဲဒါနဲ့ ကျွန်မစိတ်မရှည်တော့ဘူး။ (ကိုယ့်ကိုကိုယ်ဟန်ဆောင်တာတောင် မေ့သွားတော့မလို့၊ ဒါပေမယ့် မမေ့ဘူး :P)

အဖွားကြီးကို လက်တို့ခေါ်လိုက်ပြီး “come here and sit, come ”ဆိုပြီး နေရာဖယ်ပေးလိုက်တယ်။ အဖွားကြီးက thank you တွေဘာတွေလည်း ပြန်မပြောတတ်တော့ အမူအရာနဲ့ပဲ ကျေးဇူးတင်ကြောင်း လှိုက်လှိုက်လှဲလှဲပြုံးပြတယ်။ မြန်မာအချင်းချင်းမဟုတ်ပဲ တစ်နိုင်ငံခြားကောင်မလေးက သူ့ကိုနေရာဖယ်ပေးတာ သူသိသွားပါလိမ့်မယ်။ အဲဒိအချိန်မှာ ကျွန်မကိုအားလုံးဝိုင်းကြည့်နေတယ်ဆိုတာ ကျွန်မသိတယ်။ ရုတ်တရက်ကြီး ကားကတိတ်သွားတာကိုး။ ကောင်လေးကောင်မလေးတွေအုပ်စုလည်း စကားမပြောတော့ဘူး။ တစ်နည်းပြောရရင် ကျွန်မက နေရာဖယ်ပေးလိုက်တာကို သူတို့ရှက်သွားပုံပဲ။ လူမျိုးခြားကဖယ်ပေးမှ ထိုင်ရတဲ့အဖွားကြီးကို အခုမှတွေ့သလိုလို လုပ်နေကြတယ်။

ကျွန်မ ဒေါသထွက်ပါတယ်။ အစကတော့ ပျင်းပျင်းနဲ့ ကိုယ့်ဟာကိုယ်ရုပ်ရှင်ရိုက်တဲ့သဘောပဲ။ အခုတော့ အပျင်းပြေ ဒေါသထွက်ဖြစ်သွားရတယ်။ မြန်မာလူမျိုးအနေနဲ့သာ အဲဒိအဖွားကြီးကို နေရာဖယ်ပေးလိုက်ရင် သူတို့ဘယ်သူမှ သတိထားမိမှာတောင် မဟုတ်ပါဘူး။ အခုက ကျွန်မဟန်ဆောင်ပန်ဆောင်လုပ်ထားတဲ့အတွက် သူတို့ရှက်သွားကြတာ။ သူ့ဘေးမှာထိုင်နေတုန်းကတော့ ပြုံးပြုံးကြီးနဲ့ တစ်ခုခုပဲပြောတော့မလို၊ မိတ်ပဲဆက်တော့မလိုတွေလုပ်နေတဲ့ ကျွန်မကို နေရာပေးတဲ့အန်ကယ်ကြီးကလည်း ကျွန်မဖက်ကို လှည့်တောင်မလာတော့ပါဘူး။ ကောင်လေးကောင်မလေးတွေလည်း မရီနိုင်တော့ဘူး။ ဒါဘာလဲ မလုံမလဲဖြစ်ကြတဲ့သဘောလား။

မြန်မာလူမျိုးတွေဟာ သနားညှာတာ ရိုင်းပင်းတတ်ကြတယ်တဲ့။

ကျွန်မကဘာပြောရမလဲတောင်မသိဘူး။ အူကြောင်ကြောင်မျက်နှာပေးလေးနဲ့ပဲ ဆက်လက်သရုပ်ဆောင်နေလိုက်တယ်။ နွယ်သာကီရောက်တဲ့အထိ ကျွန်မနေရာမရတော့ပါဘူး။

နွယ်သာကီရောက်တော့ သူကလမ်းထိပ်ကို လာကြိုပါတယ်။ နေ့လည်စာအပြင်မှာစားတော့ ဆိုင်ရောက်တော့ မနေနိုင်မထိုင်နိုင် သူ့ကိုပြောပြမိတယ်။
“မင်းကလည်း တော်တော်ဆော့” တဲ့။

ရီရမလား ငိုရမလားမသိဘူး။

2 comments:

နန်းညီ said...

မဲ့ရမှာ

မိုးခါး said...

သက်ပြင်းချ ခေါင်းခါသွားတယ်